Ynglŷn â’r IPCC

​Sefydlwyd yr IPCC gan Ddeddf Diwygio’r Heddlu a daeth yn weithredol yn Ebrill 2004.

Mae’r IPCC yn annibynnol, ac mae’n gwneud ei benderfyniadau yn hollol annibynnol oddi ar yr heddlu, y llywodraeth a’r achwynwyr.

Prif bwrpas statudol yr IPCC yw cynyddu hyder y cyhoedd yn system gwynion yr heddlu yng Nghymru a Lloegr.

Mae’r IPCC hefyd yn ymchwilio i’r cwynion a’r honiadau mwyaf difrifol o gamymddwyn yn erbyn yr heddlu yng Nghymru a Lloegr, yn ogystal ag ymdrin â rhai apeliadau gan bobl sy’n anfodlon ar y modd y mae’r heddlu wedi trin eu cwyn.

Mae’r IPCC yn gyfrifol am ymdrin â chwynion difrifol a materion ymddygiad yn ymwneud â staff yr Asiantaeth Troseddau Cyfundrefnol Difrifol (SOCA), Cyllid a Thollau Ei Mawrhydi (HMRC), ac Asiantaeth Ffiniau’r Deyrnas Unedig (UKBA).

Ar 16 Ionawr 2012, diddymwyd Awdurdod yr Heddlu Metropolitan a sefydlwyd Swyddfa’r Maer dros Blismona a Throseddau (MOPAC). Yr IPCC sydd yn gyfrifol yn awr am benderfynu a ddylid ymchwilio i honiadau bod MOPAC neu ei Ddirprwy wedi cyflawni trosedd.

Ar 22 Tachwedd 2012, etholwyd Comisiynwyr yr Heddlu a Throseddau ar gyfer pob llu heddlu yng Nghymru a Lloegr. Yr IPCC sydd yn gyfrifol yn awr am benderfynu a ddylid ymchwilio i unrhyw honiadau bod y Comisiynwyr neu eu Dirprwyon wedi cyflawni trosedd.