Gwybodaeth am gyflwyno cwyn

Allaf i wneud cwyn?

Dim ond â chwynion ynglyn ag ymddygiad, neu ymarweddiad, swyddogion a staff yr heddlu y gall yr IPCC ddelio â nhw. Yn gyffredinol, gallwch wneud cwyn os:

• mai atoch chi y cyfeiriwyd yr ymddygiad yr hoffech wneud cwyn amdano
• y cafodd yr ymddygiad yr hoffech gwyno ynglyn ag o ‘effaith niweidiol’ arnoch. Golyga hyn i’r ymddygiad gael rhyw fath o effaith ddrwg arnoch, p’un a oedd wedi ei gyfeirio atoch neu beidio. Efallai ei fod wedi peri gofid i chi, neu i chi wynebu anghyfleustra o’i herwydd, efallai eich bod wedi dioddef rhyw fath o golled neu ddifrod o’i herwydd neu efallai’ch bod wedi’ch peryglu
• roeddech yn dyst i’r ymddygiad yr hoffech gwyno amdano (fel arfer, mae hyn yn golygu'ch bod yn llygad-dyst, ac nid i chi ei weld ar y teledu, er enghraifft)

Neu, os oes gennych ganiatâd ysgrifenedig ganddynt, efallai’r hoffech wneud cwyn ar ran rhywun arall sydd yn un o’r categorïau hyn.

Am beth y gallaf fi gwyno?

• Gallwch gyflwyno cwyn am ymddygiad unigol unrhyw swyddog heddlu neu unrhyw aelod o staff yr heddlu.

Er enghraifft, os byddwch yn meddwl bod swyddog wedi bod yn anghwrtais tuag atoch, wedi peidio ymchwilio i drosedd yn briodol neu achosi difrod i’ch eiddo.

• Nid yw cwynion am bolisïau a gweithdrefnau cyffredinol yr heddlu, yn ogystal â materion eraill yn ymwneud ag ansawdd gwasanaeth neu benderfyniadau gweithredol, yn dod o fewn cylch gorchwyl yr IPCC. Dylai cwynion o’r fath gael eu cyflwyno i brif gwnstabl yr heddlu dan sylw neu’r awdurdod heddlu lleol.

Er enghraifft, os byddwch yn meddwl nad oes digon o heddlu yn eich ardal, y dylai’r heddlu roi blaenoriaeth wahanol i ymchwilio i droseddau neu y dylid newid rhan o’r ffordd y mae’r heddlu yn gweithio.

Pa Safonau Ymddygiad Proffesiynol sy’n arwain heddluoedd?

Mae Safonau Ymddygiad Proffesiynol yr heddlu yn nodi’r safonau disgwyliedig gan swyddogion yr heddlu. Mae hyn yn cynnwys y gofyn i:

• weithredu yn ddidwyll ac unplyg
• drin aelodau o’r cyhoedd a’u cydweithwyr â pharch
• beidio camddefnyddio’r pwerau anghyffredin a’r awdurdod a roddir i swyddogion yr heddlu
• weithredu mewn modd nad yw’n dwyn anfri nac yn tanseilio hyder y cyhoedd yn y gwasanaeth heddlu

* Gall effaith niweidiol gynnwys trallod, anghyfleustra, colled neu ddifrod, neu fod mewn perygl neu risg. Er enghraifft, gall hyn fod yn berthnasol i bobl eraill sy’n bresennol yn y digwyddiad neu rieni plentyn, unigolyn ifanc neu ffrind yr unigolyn yr effeithiwyd yn uniongyrchol arno. Nid yw’n cynnwys rhywun y gall gwylio digwyddiad ar y teledu neu ddarllen amdano yn y cyfryngau fod wedi peri gofid iddo.